Goso de ringratziamentu pro Santu Mateu (2008).

Scritto da ztaramonte

Pubblico una seconda versione dei “goso”, che ripercorre quasi per filo e per segno, i festeggiamenti religiosi solenni per il Patrono San Matteo e che a loro volta contraddicono forse interamente quelli che lo stesso autore ha scritto prima della festa.

Amadu Carulu, custu manzanu, ida sa prutzisione ‘e deris, mi so penetidu de su c’aio iscritu pro Santu Mateu e tando pro penitentzia e pro domandare iscuja a totu sos tzaramontesos dae a mie criticados in su goso c’asa ja prubicadu, siguramente pro ispiratzione de Santu Mateu, n’apo fatu un ateru de ringratziamentu, iscritu comente s’ateru segundu sos consizos de Tore Patatu, chi poi est su ghi cherene sas concas de ou de Sa Regione Autonoma de sa Sardigna. Ringratzio Domitilla Mannu chi istustinada da-i-e-a mie in su telefono m’at dadu consitzos pretziosos.

Anghelu ‘e sa Niera

Goso de ringratziamentu pro Santu Mateu (2008)

Totu cantu Tzaramonte
Pro sa festa s’est movìdu
Man’ in petus e man’in fronte
su divotu est accudidu

Totu a sa prutzisione
De su santu in pompa magna
Cun su coro in contritzione
Grascias goltas che cuccagna

Non podiat santu Mateu
Faghere finta ‘e nuda
Ca puru si fidi ebreu
De tanta zente s’abuda (t)

Baia meda cavaglieris
E piseddas in costumene
Baiat puru bersaglieris
E sa zente che i su ramene

Bi vin totus sos cofrades
Biancos che i sos lentolos
Cun piu traggiu de sos padres
Belos che- i – sos noitolos

Bi vin puru sas cusores
De su piu santu rosariu
Isas altas che sa i tores
Solu aian cus’armentariu

Unu fiotu ‘e chirighedos
Biancos nidos che su nie
Protzedian che angheledos
Cando avreschede sa die

Benian poi sos chibantenes
Totu cun su Santu a codu
Bestidos in biancas bestes
Protzdiana a core modu

E beniat poi su Vicariu
Cun su mantu piviale
Retzitende su rosariu
Pro totu s’amadu idale

Don Tiloca s’iscuredu
Fidi ispintu in carotzeda
Cuntentu che giaghenedu
Cando sonat campaneda

Su prosindigu sighiat
Bell’in cara e bell’in fronte
Cun sa fascia protzediat
De Italia ‘e Tzaramonte

E comente in s’atunzu
Sas fotzas movet, su entu
Recuendelas in punzu
Gai Tzaramonte a s’eventu

Mannos minores e betzos
Fini totu in prutzesione
Finza de sos Deus tzegos
Miraian dae su balcone

E su Santu gloriosu
Subra totu sas bandelas
Sempre pius amantiosu
In Chelu tesiat telas

Invochende dae Deu (s)
Su perdonu ‘e sos pecados
Pro su bonu e pro su reu
Ca Cristu nos as salvados

Cun sa Morte ignominiosa
Cun sa sua Resuretzione
Cun sa vida dolorosa
Cun sa nostra contritzione

Mateu Santu gloriosu
Nois chi semus pecadores
Gratzie a tie epemus gosu
Puru in mesu a sos dolores

Totu sos tzaramontesos
Betzos mannos e minores
Sian credentes sian ate(s)os
Pro nois prega peccadores

Chi nos salvet Cristu Gesu
Pro sa tua intercessione
E no che oghet da -i- mesu
De ogni trista danatzione.

O Mateu santu gloriosu
De nois ses aparadore
In caminu perigliosu
Nostru Santu protetore

Anghelu ‘e sa Niera

Condividi su Facebook