Poesias de Tzaramonte: Ammentos caros (Bainzu Truddaiu)

Scritto da carlo moretti

Ammentos caros

de Bainzu Truddaiu

In sa mia briosa pizzinnia,

cando sas forzas mi faghian giogu,

fia che burvura accurzu a su fogu

prontu a m’azzender a dogni sisia.

Bessio a giru che mazzone a runda

in sos istazzos de Su Sassu meu:

chirchende unu risittu, unu recreu

de calchi giovanedda pili brunda.

In sa bella Caddura e in s’Anglona

m”idian fin’a lughes de istellas,

tra faccias risulanas, faccias bellas

de zente campagnola umil’e bona.

Cussos aspriles e marralzos santos

fini abitados da-e amigos mios:

bi pesaimus cun tottu sos brios

ciarras delizziosas, ballos e cantos.

Ah, cantas boltas che fadas in riu,

a manu appare cun prendas de oro

fia ligadu a su fogosu insore

affettu santu e de candores biu!

Campagnas fin de majias pienas

che antigos zigantes leggendarios,

o paladinos puru immaginarios

tra carignos de ninfas e sirenas.

Ah cantas fantasias de ammaju

han cue s”adde, su riu e pianu

in sa suavidade ‘e su manzanu

sutta sas lughes de abril’e maju!

Pinnettas ricramadas de fiores

b’hapo ‘idu fumende a tottu gustu,

cando s’anzone e su crabittu arrustu

coghian in s’ispidu sos pastores.

Ah, ite festas de sinzeridade

tra Musa pastorale pius antiga:

su risu da-e coro a fala e piga

fit su tesoro ‘e sa felizzidade!

In sos Carrasegares, in sas Pascas,

cantas bellas baldoris! De tando

bido su mele coment’e a cando

lu ‘idet s’abe in fiores e frascas ….!

Condividi su Facebook