SA TEBACCHERA DE COMARE de tiu Bainzu Truddaiu

Scritto da carlo moretti

Sa tebacchera ‘e comare

est sempre a s’aberi e tanca,

ca medas bi ‘ettan franca

chirchende de tebaccare.

Su fiagu ‘e su tebaccu

a medissimos piaghet:

issa tesoro nde faghet

de s’urna senza covaccu,

guasi che unu maccu

chi lu solen abbizzare

a su tuccaru.  A pensare,

ite razza ‘e ìscoberta!

Et est sempre mesu aberta

sa tebacchera ‘e comare!

Giovaneddos de vint’annos.

cando est morzende sa die,

a iscasciu sun inie

finas a fiottos mannos.

Rimedios e ispannos

chi sanan dogni bullanca

bi chircan a faccia franca

cando iscurigat s’aera;

gai cussa tebacchera

est sempre a s’aberi e tanca.

Dami tinta e pingo puru

su caminu inghiajadu

de unu chelu isteddadu

in nottes de pagu iscuru;

cumponzo su duru duru

pro pizzinnos mezzanos,

chi cun cavanos ispanos

no han reposu in sa ninna.

Ajo. dami carta e pinna

che in sos birdes beranos!

Pro s’istajone amorosa,

si mi daeras cantones

fatto ‘ider sos puzones

in d’una mendula umbrosa.

Beni, Musa: non ch’hat cosa

chi non bramet cumpagnia!

Cantare totu cheria

cun murmutteddos de fadas:

che in epocas passadas,

Musa, dami poesia!

Bainzu Truddaiu

Condividi su Facebook