Contadu – Andende a Santa Justa.

Scritto da ztaramonte

Finas in antigorìu, s’ultima dominiga ‘e maju, sos Caddalesos, sos parentes ei sos festaresos de sas biddas acurzu, abbojaian chitulanos a Funtana Ispurulò pro tucare tot’umpare a sa cheja foraidda ‘e Monte Rosa. Ca b’aiat festa manna, sa die, pro sa Santa prus meraculosa de su paradisu, Santa Justa, famada totue in Anglona e finas in Caddura e in Logudore.

In sa pedimedda ‘e funtana etotu, che tando oe atelat s’afestu: saludos e basos, cantigos e sonos, brincos e ballos, impudonzu e pregadorias, curridìnas de pizzinnos chen’assentu s’ispanian in s’aera melina chei su’elidu jaru de sas ‘amas paschende asselias, josso in s’adde pinta.

Ealla, como, tota custa zentoria tuchende a lerina che fromigula in s’itirinu astrintu e cuiditu; chie a pê, chie a caddu, chie a in carru, chie isculzu cun sas botes a coddu a bertulinu, chie topi-topi che boe inzoidu e chie, in ultimera, ufanu e lebiu che puma.

Chicu Babau, su jaganu majore, est a cabu ‘e s’andainacun su pê ‘e sa rughe abbuddadu in sa trinza ‘e sas ragas, altu che una roca, abbrembonadu e encherridu che cadde rude. E che caddu sueradu isulfulat abberriende adaghi sos piseddos. coghi ‘ e resare, lean a sonare truveddas de ervenarzu: “Sonadebos sas costas!”

Babbai Urinzu l’est infatu, rujanu e minudu, cun sa corona pendulende in manos e intonende, a tretos, cun boghe atalzina sos gosos de sa Santa.

Tottinduna unu leppereddu, isfadadu dai cussa passera chimentosa, nd’istupat sonni-sonni dai sa chejura fozida e che parat in sa calchera pesuda de totu cussos pês in antera.

Ero no ischit cale ‘eretu leare: truvat a ala ‘e nanti e azupat a su carrone de una craca bullitada; luego torrat insegus e istraoltu li falat in cumeros unu rocu; tando ch’ ‘essit a manca e unu crastu lu leat a conca neta, pustis leat a dereta e un’ischintorzada li cancarat sas orijas.

Chen’ispera, tando, s’atuturrat preguntedesi a chie isse aiat dadu in pizu e pronte Santa Justa, gai cori ‘ona finas cun cuddos cristianos chi no meressin mancu abba bruta, n s’apeneret de isse malefadadu.

S’andaina s’est arressa: calecunu at iscobiadu, Chicu est torrend’insegus, reminidu, minateri: paret chi cherfat azzotare cuddos chi, a coa ‘e lerina, si sun leende su mal’apentu. Totu si dan banda che cando colat fogu, mudos, parados che pedras de sale. Jompidu a su “calvariu” isperiat, in unu patrefiliu, cantu b’at: s’arrodiu ‘e sos malintragnados, sas feminas lastimosas, su lepereddu atuturradu. Ero finas isse, isfidiadu malu, leat a azimare cudd’animedda e dai s’altaria de cussas manos mannas pesadas in aera sa rughe nd’istrampat e muidende che alvure isfundada sai s’ultima imbudada de unu ‘entu malu. Ebbia su Cristos, de ozastru istajonadu, est intreu bardende a unu ganzu, cun sas manos istampadas e cun sos pês galu accaddados, su poberu disdisciadu. E nd’at tristia manna, iteu, pro esser istadu leadu, a mala ‘oza sua, a traste de cust ‘ateru pecadu de su mundu.

- Oddeu! Poberu lepereddu! – abboghinan sas mamas adoloridas ei sos pizinneddos nusentes, imprimendosi sas manos laras.

No, no b’est prus su lepereddu: che l’at ja posta, mancariaddolimadu e tracheddende che carruleddu ‘e canna ‘e pizzinnos, in s’isticarzu seguru de su ruarzu umbrinu. Ja at a sanare, e daghi at a essere cojuadu nou forsis non si nd’at a ammentare.

Tames, interi chi in culvenu, cun su coro ‘ola-‘ola s’est tantende a dilig’a diligu sa carena dilimazosa, unu trainu ‘e meledos currit orioladu in sa stramas de sa mente sua aggolotada. Luego si l’abbian sos ammonestos de su pagubene ‘e mama sua addaghi, carinnosa, li naraiat, ammeniendelu a parare frunte a sos istragos de sa vida:

- A lu ‘ides cuddu coiamprosu? Est su lodde. E ja no est transosu! No ti fides e fue, daghi lu seras.

- A lu ‘ides cudda? Est s’ ‘atu areste. mandigat peta ebbia: sorighes, campinos, puzones, tilighertas e finas lepereddos. Tue no li bias audenzia ca t’inganna a t’apentare cun issa joghende a dies interas a cucurumeddos e a custu mundu no as a aer mediu de contare a memos sa malas indennas suas.

- Ei cuddu a lu ‘ides? Est su cane, su teracu finas de sos teracos. Forsis apeddat, bidendedi, ebbia po ischitire cudd’ugna ‘e pane mugheradu chi su mere li lampat tenzendelu die cun die presu a su frascone ‘e su pasciale.

- E tando, mamaredda, de amigos nois no nd’amus?

- Fizareddu meu, su mundu est prenu de animales amigos nostros, francu custos pagos chi apo nadu e un’ateru, a duas ancas, su prus malu chi s’agatat, chi no t’apo galu fentomadu: s’omine. E ite pignu ‘e remonire in canteranu! Cussa ja est de timere a frea, ja! Si creet su mere de su mundu, est semper in gherra, no at afriscione mancu pro sa repula sua, luat s’abba ei s’aera, brujat sos trabines, petigat s’erva, isarchilat si bestiamine anzenu, s’imbreagat, narat sa peus faulas, traighet finas sa mama. S’at bendidua Cristos, pessa pro trinta miseras otinas. E l’at mortu. No leas e ti lu corcas a pês, si as de faghere , chi ja ti los carras sos contones!

Su sole ch’est barigadu e interi chi s’aera s’est trinende de samben e de oro, sos ultimos festaresos che sun cabulende in sa pigada crispa ‘e Fustialvos.

Lepereddu no est fiadu chi ‘aliat meda sa sedda e pijados sos cosinzos, a s’arrumb’arrumba che la ponet in ata ‘e cheja, cun su fele in pitu ‘e dentes. Su patiu est totu imbarazzadu ‘e ampullas boidas de ‘inu, de chirriolos e pabiru unitmosu, de coa ‘e fenujanis, de ossamine de ‘erveghe, de corra ‘e cocoi, de pane abbaunzadu. Nues de ‘espe e de musca si sun gherrende su recatu rusuzadu.

E ch’intrat, tanchende sa janna e bell’a bellu pro chi no ciulet e pro chi s’arrejinu sou a Santa Justa no isfadet s’eremitanu ja drommidu dai ora in sa pezza, a bue ‘abberta, cun sa bae fala-fala.

- Bene narat su diciu chi “chie at santu in corte no morit de mala morte”. E cale santa prus cori ‘ona ‘te, Santa Justa dechida? Si tue no m’aeres betadu s’ala, comente dia esser paradu? Ero una chenscia ti dia cherres faghere. Ja as bidu su chi cuddos malintragnados m’an fatu custu manzanu ei su chi, mal ‘e peus, an fatu dai antigorios a Babbu Mannu a a sas oberas suas. Crees abberu chi sos meraculos sien sos mezus trastos pro abboniare su cristianu? No ti ses galu abbizada chi isse creet de si los meressire, comente chi sas malas fainas suas sien ebbia mossos de muscas caddina e tue no appas allegas pro ti nd’addolire? A onzunu s’arte sua, m’as narrere, e ja est beru: ero si nessi un’iscutaredda aere in podere meu sos trastos tuos, un’irrida ‘e lampus lu diat solovrare de manera chi mancu a furchita nde lu dian acabidare. Mira, o Santa Justa dechida, chi custa bulvera de omine est chei su dimoniu, peus de su dimoniu; at fatu sas padeddas e b’at apedrigadu sos cobertones!

Totinduna Lepereddu si parat mudrigu, alluzende, che unu pedidore, su bultu ‘ sa Santa.

Santa Justa no torrat berbu e sighit a mirare, cun ojos de pinnadellu, su bruncheddu ‘e s’ultima candela mori- mori.

Giorgio Addis.

Tratto dal Periodico Mensile di Poesia Letteratura e Arte di Sardegna, “S’ischiglia” del 7 luglio 1993.

Condividi su Facebook