Che tue, rosa mia – Giovanni Antonio Piga di Perfugas

Scritto da carlo moretti

Giovanni Antonio Piga(XVIII-XIX secolo)

Poeta di Perfugas, visse tra il 1700 e il 1800.

Che tue, rosa mia

Che tue, rosa mia,
in peruna zenia
non nde dent incontrare.

Gasi bella adattada
in persona adornada
non nd’esistit manc’una,
intesa e iscultada
e meda prezziada
ses pius de sa luna,
sola in mundu ses una
e det haer fortuna
chie ti det lograre.

Ses arca de Noè
e suspesu hat in se
su tou esaltamentu,
de su Chelu su Re
espost’hat tot’in te
su Nou Testamentu;
ogn’hora, ogni momentu
personas milli e chentu
ti solene pregare.

Che sole ses eletta
de grassias cumpleta
già t’hat su Soberanu,
immaculada e netta
ses istada cunzetta
pro su gener’humanu
e dadu t’hant sa manu
chi ogni cristianu
lu poteras curare.

Ses gianna de su Chelu
senza niunu velu
naro sa veridade,
fiore de su Carmelu
già t’hat fattu cun zelu
tota sa Trinidade,
e ogni magestade
honore e podestade
ti hant cherfidu dare.

Funtana segnalada
ses istada jamada
pro dogni meighina,
sa chi ses acclamada
e cun coro pregada
già ses tue, o Reina,
ca s’anima mischina
in sa corte divina
ses padrona azzettare.

Zedru, zippress’e lizu
sunt totu un’assimizu
contra custa Segnora,
pro chi s’eternu Fizu
hapidu hat disizu
hàerla a genitora,
sa musica canora
innos de imperadora
cumandu hat a sonare.

Zittade ’e su Segnore
e turre de valore,
ah, ti so cuntemplende!
ca cun sinzeru amore
s’aff ittu peccadore
già istas diffendende,
e lu ses vigilende
pro cuddu chi tentende
est sempr’a lu dannare.

Istella maritana
d’abba viva funtana
e chelu senza nue,
cudda ch’hat totu sanat
de ogni mancia humana
confirmo chi ses tue,
solu in te si concluet
luna chi lassas ruer
grassia particulare.

O hortu concluidu,
a tie hant succurridu
in custa pestilenzia,
e tue da ch’has bidu
custu regnu affliggidu
placadu has sa sentenzia,
cadrea ’e sapienzia
chi miras cun clemenzia
s’aff ittu in su penare.

Si, o Mama avvocada,
in sas gherras jamada
ses arma sa pius forte,
tue ses sa dittada
d’esser nostra avvocada
in sa zeleste corte,
de fagher chi sa morte
totu su mundu sorte
tenzat a ti gosare.

Che tue, rosa mia,
in peruna zenia
non nde dent incontrare.

Condividi su Facebook