In sos marralzos de Su Sassu meu (de Bainzu Truddaju)

Scritto da carlo moretti

(a su giornalista e poeta Paulu Pillonca)

Cun arma a coddu e cartuccera in chintu

pius no m”idene in Su Sassu, [1] inue

antigamente fit famosu igue

su logu pro bandidos fentomados,

chi de sa Benemerita soldados

lis han bastante su “grillette” astrintu.

Cue Giuanne Fais bandidende

b’hat passizadu longos sessant’annos

cun treghentos bandidos cori mannos

de iras pro S’anglona e pro Caddura.

Tra sa crudelidade fea e dura

istaian disastros semenende.

Cue tra rundas de rios e nassas [2]

movian in sas puntas pius altas

mannos unturzos cun alas ispaltas

pri mortozos de omines barvudos

assoliende in terrinos ervudos, [3]

tra chentu e una isceras de carcassas …

Cussu logu de sambene e timidu,

in tottue connottu pro Su Sassu:

l’hap’ eo attraessadu a passu passu

cando fia ficchidu e fia forte.

Già chi como sa dura malasorte

m’ha a pèssimu puntu reduidu.

Cue como baranta e chimbant’annos

mi divertia tirende a sa mèria

a s’aranzu, a su casu; o a sa sèria

cantende in nott”e luna fattu a s”ama,

e ue boltas meda a totta brama

m’han visitadu poetones mannos.

Como ando appoggiadu a unu bàculu

e boltas puru mi dana sa manu

sos caros mios, nendemi: “Pianu

camina e ista attentu ne abbojes,

traficos feos e non ti trobojes,

ca si ses biu est già unu miraculu!”

Como Su Sassu meu non piusu

mi dat nuscosas mentas de trainos,

ne lizos e ne rosas de giardinos,

ne abba frisca ‘e sa funtana mia.

Ah, disgrasciada e fea maladia,

cantu de tantos benes mi has isclusu!

Note:

---

Condividi su Facebook