Contados de iscrittores tzaramontesos.

Scritto da ztaramonte

Su fioccu ruju

de

Larentu Brozzu  - Tzaramonte

S’ijerru, chi già in su mese ‘e martu, comente naraiat su tzaravagliu deviat esser mortu, in ultimos de abrile fît ancora ‘iu. Intro su casteddu de sas istajones, aiat tancadu ogni ventana pro no lassare intrare su ‘eranu, chi, affrittolidu, biddiosu e bentosu, si cheriat affianzare e si fagher ninnare in su bantzigu cun sos fiores dae sos rajos tebios de su disizadu sole.
In bidda mia, sas cobelturas aggrunciulidas dae su frittu, fin ancora anneuladas dae su respiru affannosu de sos fumajolos ch’isparghian a dogn’ala su profumu de sa chessa brujada e da sa petta arrustu: impronta de un’ijerru ancora ‘innidu chi cun su fuette ‘e sa traschìa che fachiat intanare sos betzos a su chizolu affumigadu de zimineas istraccas.
Ogni tantu, a s’isperagliu de giannas antigas, s’acceraian caras lijas, de chera, surcadas dae sos annos, ma cun sas pupìas lughentes de ispera pro chi su ‘eranu tantu disizadu ch’aeret ispintu s’ijerru a sa pentuma ‘e s’olvidu.
Tia Franzisca puru, una femina de un’ottantina ‘e annos, nd’at bogadu su biccu pro isperiare s’aera e porrogare sas nues in mente sua.
- Cando! Ma cando custu sole beneitu s’at a dignare de carignare custas carrelas assonnadas pro chi sos pitzinnos, su cantigu ‘e sos puzones, sos risitos de sa zente felitze las bestan a festa? Cando m’apo a poder setzer in su banchittu pro assaborare su calore de sos basos suos e m’allebiare sos dolores chi cun sos annos s’an fattu su nidu in sa carena mia? -

In cuss’istante, su rumore de una moto accellerada l’at attuddidu sas carres.
At intesu su muizu de su ‘entu passendili in su mutzighile, ma bastaiat solu su rumore pro cumprender chi fît Buccianeddu.
- Buccianeddu, Buccianeddu – abboghineit tia Frantzisca – ancu gires su cherveddu.
Ma in mente sua fît nende: – Buccianu, Buccianu, ancu no t’agattes a manzanu! E nd’aiat rejone cudd’iscura! Pro gulpa sua, issa chi no aiat mai connottu ne duttores e ne ispidales in d’una vida manna, in tempus de duos annos, in s’ispidale, bi fît ‘intrada duas boltas. Sa prima ‘olta pro unu bratzu truncadu, tres costas cannidas e un’atera truncada chi che li fit intrende in pimones.
Sa secunda ‘olta, ses meses faghet, pro un’anca truncada in duos logos chi ancora oe ficchiat male e la faghiat toppigare.
Fît issu Buccianeddu chi l’aiat fattu cussos regalos. Mentres chi si fît assoliende, setzida in su banchittu ainnanti ‘e sa gianna sua, cun cussu carru armadu (comente giamaiat sa moto tia Frantzisca) pro duas boltas si l’ait posta sutta.
Buccianeddu, comente lu giamaiat totta sa ‘idda fIt unu piccioccone de unu meto e noranta, cun sas palas chi pariat un’armadiu, sos pilos brundos de oro chi nde li falaian fintzas a chintu muntesos cun d’unu fioccu ruju chi passaiat dae sa fronte a su attìle e duos ojos in colore ‘e mare chi pariat unu paladinu de cantu fît bellu. Cantu fît bellu, fît malu, rebelle e imberriadu.
Dae cando aiat murmutadu sa prima paraula, aiat nadu: – Chelzo – Tottu sos gingiris ch’ ‘idiat los cheriat. Su babbu e-i sa mama, essendesi cojuados cun sos pilos canos, no isperaian de poder aer un’ereu e cando est naschidu Buccianu, pro sa felitzidade l’an lassadu fagher e dadu tottu su chi cheriat.
Est creschidu visciosu, arrogante e mandrone. A iscola no b’andaiat mai, su tempus lu passaiat in bicicletta cando fît minore, in motorinu cando aiat battoldigh’annos e cando at giompidu sos degheotto, at fattu ‘ender una tanca a su babbu pro si comporare sa moto. Una moto giaponesa, manna e cun battor fumajolos (comente naraiat tia Frantzisca). Dae sa die, in bidda e in sas biddas de su ‘ighinadu, at semenadu su terrore. Passaiat in sas carrelas che ascia ‘e raju, boltulende tottu su chi agattaiat in mesu caminu. Sa zente, ma sos pius betzos e pitzinnos, su solu intender su rumore, fuian isperesciados arrumbendesi a sos muros e a sas giannas. In bidda, non passait chida chi no nde bisestraiat. Fintzas a oe, a s’ispidale che nd’aiat ispididu pius de trinta, chentza contare sos ch’at bisestradu e chi los at meigados su dottore.
Issu puru nde fît ruttu paritzas boltas, ma solu calchi raffia e calchi pantalone isdrijidu. Sa mama non podiat abberrer bucca pro lu rimproverare de cantu lu timiat e su babbu, ancora pius pagu; cuddu colzu! oramai che fît accultzu a sos settanta, pintzionadu e mal’andadu ‘e salude, ogni manzanu prima ‘e fagher die, ch’essiat a campagna pro cuntivizare sos pagos terrinos chi li fin restados, da-ue, mancari pagu, buscaiat su tantu ‘e campare, ca sa pinsione serviat pro sos divertimentos de su fizu. Una ‘olta sola si fît proadu a negare su ‘inari a Buccianu, ma cussu fizu chi aiat intregadu tottu sas isperas pro un’etzesa serena, cun duas isbattuladas che l’aiat fattu brincare sas pagas dentes chi li fin restadas. Totta sa die in sa campagna, tribulaiat finas a ruer che saccu boidu pro ismentigare, o a proare a ismentigare su dolore acutu de unu pugnale chi su fizu l’aiat ingravadu intro su coro. Torraiat a domo a notte manna, ca s’icurigore li cuaiat sa ‘irgonza, su disisperu sulcadu in sa cara turmentada, ma pius ancora pro no incontrare su fizu chi a-i cuss’ora, ischiat chi che fît divertendesi. Poi de aer chenadu, semper cun pagu appititu ca su recattu fît semper isgiaboriadu dae su rantzigu chi ogni die ch’ingulliat, istraccu si che drommiat, no innanti de aer infustu su cabidale de lagrimas. Su nomen de su fizu, fît dae meda chentza lu pronuntziare e chentza lu ‘ider fît pius de ses meses, ca, fintzas pro ritirare sa pintzione bi pensaiat Buccianu, issu no ischiat mancu cantu leaiat.
A parte sos divertimentos de notte, su gustu ‘e Buccianu fît de passare cun sa moto accellerada in sas carrelas istrintas pro currer fattu a sa zente asciucconada, tantu, non b’aiat òmine chi teniat coraggiu de l’affrontare de cantu fît malu e forte. Cando deviat boltare in biccu, nde pesaiat sa moto rea che cadducaddu a sa moto fît unu campione, ma fît campione puru de divertimentos maccos: currer fattu a sos canes, sa battos, sa zente. Sa conca sua fît bene frunida ‘e pilos, ma ‘eo creo chi sa zente a s’accùa l’at bettadu piu frastimos da cantos pilos teniat. alvuradu. Ah, pro andare a caddu a sa moto fît unu campione, ma fît campione puru de divertimentos maccos: currer fattu a sos canes, sa battos, sa zente. Sa conca sua fît bene frunida ‘e pilos, ma ‘eo creo chi sa zente a s’accùa l’at bettadu piu frastimos da cantos pilos teniat.
Tia Frantzisca, semper accerada a s’isperagliu isettende su sole, l’at torradu a bider passende e murmuteit in mente sua: – Mi, tottu ‘estidu ‘e pedde s’est! Male chi ti che trunches su coddu! -
Sas nues in s’aera si podian segare a fittas e dae s’adde a pês de ‘idda, si fit pesende sa neula, bastende cussu giassu chi pariat un’incantu, cun d’unu mantu in colore ’e chijina, fattendela assimizare a s’inferru istudadu dae su frittu ‘e sa morte.
Su frusciu ‘e su trenu imboligadu in cussa neula casca, cheriat narrer chi si fît accultziende a su passazu a livellu. Buccianu a tota fua fît falende a badde fattende s’acrobata, su maccu. A sa moto, in s’istradone tottu curvasa, li faghiat fagher sos brincos de crabola ficchendela rea. Fît allegru comente semper e su ‘entu chi segaiat che ispada arrodada, li pisulaiat su fioccu ruju chi mudaiat sa giua brunda isparta che alas de astore prima de ch’affundare sas francas in su pettus de sa columba.
A chentu metros dae su passazu a livellu, una fila de andolettas frimmas, fin isettende su passazu ‘e su trenu. Buccianu, prepotente e orgogliosu comente e sempre, a su postu ‘e si frimmare che-i sos atteros, at accelleradu.
Sa barriera ‘e linna che l’at truncada in nettu propriu cando fît passende su trenu. Si sun bidas solu sa istinchiddas chi sos frenos de su trenu faghian catzare a sas rodas. Cando s’est arressu, dughentos metros pius attesu, unu liju raju ‘e sole seghende sas nues e-i sa neula, at illuinadu su binariu tintu ‘e ruju. Sa moto totta a bicculos fît ispraminada in sos oros de su binariu e cussos bicculos de ferraza, nisciunu podiat narrer chi pagos segundos innanti fît una moto lutziga che prata e sos battor fumajolos ischitzados ancora fumende, aian attonadu cun su motore e-i su frusciu ‘e su ‘entu chi che giughian a chelu su coro ‘e Buccianu imbreagu ‘e vida, imbreagu ‘e gioventura: sa vida, sa gioventura, che un’imbreaghera fin isvanessidas a su primu raju de su sole de unu ‘eranu priu.
De Buccianu, intro sa tuta ‘e pedde a chirriolos, bi fin restados pagos ossos.
Solu su fioccu ruju fît intattu a costazu ‘e sa tuta che una corona.
S’aera s’est ispalattada e in sas carrelas de sa ‘idda, sos pitzinnos chi s’ijerru aiat tentu a frenu, si sun iscadenados in brincos e giogos, guasi pro poder ismentigare sa crudele disaura.
Tia Franzisca puru, setzida in su banchittu a ojos a sole, si fît iscaldende sos ossos addoloridos dae su tempus e dae sas feridas. Ogni tantu, una lagrima lutzighende e sulchendeli sa cara ‘e tristura, li faghiat ripitere dae su profundu ‘e su coro: – Oh Deus meu, perdonami, si l’apo frastimadu; perdonami. Chi s’esseret truncadu su coddu comente mi l’at truncadu a mie, ma cussu no Deus meu, cussu no! Perdonu! Perdonu! -
Cun sos ojos acculumados de piantu, fissaiat in fundu a sa carrela, ue, unu pitzinnu de ses o sett’annos, ficchiat rea sa bicicletta e sos tzuffos allorigados e moros, fini muntesos da-e unu fioccu ruju.

Condividi su Facebook