EVANGÈLIU SEGUNDU GIOVANNI – Traduidu dae Giovanna Santoru

Scritto da carlo moretti

SOS FATOS SUTZESSOS A SA TUMBA.

Sa die daboi de su sàpadu, Maria di Màgdala fit andada chito a sa tumba, daghi fit ancora iscuru, e aiat bidu chi sa pedra fit istada bortulada dae sa tumba.  Tando fit andada in presse dae Simon Pietro e dae s’àteru discìpulu, su chi Gesus amaiat, e lis aiat nadu: «Si ch’ant leadu su Segnore dae sa tumba e no ischimus inue che l’ant giutu!».

Tando Simon Pietro umpare a s’àteru discìpulu fint andados a sa tumba. Fint currende umpare ma s’àteru discìpulu fit arrividu prima de Pietro.  Si fit abbasciadu e aiat bidu sas bendas de Gesus in terra ma non fit intradu.  In s’ìnteri fit
arrividu fintzas Pietro e fit intradu intro. Aiat agatadu sas bendas in terra e su sudàriu chi teniat in conca, chi non fit in terra cun sas bendas ma pijadu in àteru logu.  Tando fit intradu fintzas s’àteru discìpulu, chi fit arrividu primu, e bidende aiat crètidu.  No aiant infatis ancora cumpresu s’Iscritura, ossiat chi Gesus deviat resuscitare dae sos mortos.  Sos discìpulos tando fint torrados a domo.

S’APARISSIONE A MARIA DE MÀGDALA.

Maria imbetze istaiat fora de sa tumba a piànghere. In s’ìnteri si fit abbasciada abbaidende sa tumba  e aiat bidu duos ànghelos bestidos de biancu, sètzidos unu a s’ala de sa conca, s’àteru de sos pes, inue fit istadu postu su corpu de Gesus.

E custos l’aiant nadu: «Fèmina, proite ses pianghende?» e issa:
«Si ch’ant leadu su Segnore meu e no isco inue che l’ant giutu».  Nadas custas peràulas, si fit girada e aiat bidu Gesus ma no ischiat chi fit issu. Tando Gesus l’aiat nadu: «Fèmina, proite ses pianghende? Chie ses chirchende?». Issa cretende chi fit su guardianu de su giardinu l’aiat nadu:
«Segnore, si che l’as giutu tue, nàrami inue che l’as postu e deo apo a andare a mi lu leare».  E Gesus aiat nadu: «Maria!» tando issa si fit girada e l’aiat nadu in ebràicu: «Rabbunì!» chi cheret nàrrere: Mastru! Gesus tando l’aiat nadu: «Non mi tratenzas proite non so ancora pigadu dae su Babbu; però bae dae sos frades mios e nàrali: Deo pigo a su Babbu meu e bostru, Deus meu e Deus bostru».

Tando Maria de Màgdala fit andada luego a annuntziare a sos discìpulos: «Apo bidu su Segnore» e su chi l’aiat nadu.

APARISSIONES A SOS DISCÌPULOS.

Su sero de sa matessi die, su primu daboi de su sàpadu, mentras chi sas giannas de su logu inue istaiant sos discìpulos fint serradas pro timore de sos Giudeos, fit bènnidu Gesus e, andadu in mesu a issos, aiat nadu: «Paghe a bois!».  E nadu custu lis aiat fatu bìdere sas manos e su costazu. Sos discìpulos si fint allegrados bidèndelu, 21tando Gesus lis aiat nadu: «Paghe a bois! Comente su Babbu at mandadu a mie deo mando a bois».  Daboi de aer nadu custu, aiat alenadu subra de issos nende:
«Retzides s’Ispìritu Santu; 23a chie azis a perdonare sos pecados ant a èssere perdonados, a chie nono, no ant a èssere perdonados». Tommaso, unu de sos Doighi, giamadu Dìdimo, non fit igue a s’arrivu de Gesus. 25Tando sos àteros l’aiant  nadu:
«Amus bidu su Segnore» ma issu aiat rispostu:  «Si non bido in sas manos suas su sinnu de sos giaos e non ponzo su pòddighe inue bi fit su giau, e non ponzo sa manu in su costazu sou, non creo».

Daboi de oto dies sos discìpulos fint torra in domo e bi fit fintzas Tommaso. Tando fit bènnidu Gesus, a giannas serradas, si fit frimmadu in mesu de issos e aiat nadu: «Paghe a bois!».  Poi aiat nadu a Tommaso: «Pone innoghe su pòddighe e abbàida sas manos mias, isterre sa manu e pònela in su costazu meu, e non sias pius dudosu ma credente!».

Tommaso tando aiat rispostu: «Segnore meu e Deus meu!». Gesus aiat nadu: «Proie m’as bidu as crètidu, biados sos chi ant a crèere sentza bìdere».

Condividi su Facebook